الاستقالة

اولا كاتكتب الاستقالة و تدير فيها 2 او 3نسخ و تمشي تكاليزيها…. غالبا كايشدو وحدة ف المقاطعة..
ديك الاستقالة المكاليزية كادير ليها فوطوكوبي…. و تجمعهوم ف شي شوميز…. الاصلية + فوطوكوبي.
كاتحطهوم للشركة ب يديك… و ياخدو الاصلية… و يكاشيو ليك الفوطوكوبي و يسنيوه و يديرو فيه التاريخ لي حطيتي فيه الاستقالة.
داك الفوطوكوبي المسيني و الكاشي ب كاش الشركة هو الدليل بلي حطيتي الاستقالة….. الا ما عطاوهش ليك راك مازال ما حطيتي الاستقالة….
ملي تشد داك الفوطوكوبي ف يديك. تما تعتبر حطيتي الاستقالة و هوما شدوها منك ب طريقة قانونية… و كايتسما accusé de reception.
دبا خاصك تعرف شحال فترة الاخطار… لي هي المدة لي خاصك تبقا خدام من نهار حطيتي الاستقالة…… كاتحسب على حسب شحال الاقدمية لي عندك…. كنتي أكثر من عاماين عندك شهر…. كنتي أقل…. عندك اسبوع.
ملي تحط الاستقالة و تاخد فوطوكوبي مكاشي…. كاتحسب المدة لي خاصك تبقا خدام… تكمل ديك المدة… كاتسلم مع الناس و طلب المسامحة و تمشي بحالك.
من بعد واحد شهر…. غادي يتاصلو بيك ترجع عندهوم…. يعطيوك 2 اوراق مهمين.
اولا شهادة العمل…. فيها بلي خدمتي عندهوم من نهار دخلتي حتال نهار خرجتي.
الورقة الثانية كاتسما تصفية كل حساب solde tout compte… كايكون فيها حسابك لي كاتسال… مثلا الكونجي لي مازال ما شديتي كايخلصوه ليك فلوس… مثلا خدمتي سيمانة ولا 15 يوم مورا ما داز الصالير… كايخصوك فيها…. و غالبا الشهر لي حطيتي فيه الاستقالة ما كاوزش ليك للبنكة…. كايجمعوه ليك معا هاد تصفية الحساب..
كاتاخد هاد ورقة تصفية الحساب كايقولو ليك سير كاليزيها…. تمشي دير ليها فوطوكوبي تسينيها و تكاليزيها… و ترجعها للشركة…. و كايعطيوك فلوسك…. غالبا كايعطيوك فلوسك شيك….
ف حالة ما بغاوش يشدو منك الاستقالة اولا ما بغاوش يكاشيو ليك الفوطوكوبي…. و كايتعكسو معاك….. هنا كاتعيط ل مفوض قضائي كاتخلص ليه 200 اولا 300 درهم… و هو كايحط ليهوم الاستقالة و كايكتب محضر قانوني فيه بلي فلان فرتلان عطانا استقالة ديالو و حطيناها ف شركة فلانية ب تاريخ الفلاني و بحضور المسؤول الفلاني ولا المدير الفلاني ولا العساس الفلاني… و داك المحضر هو دليل بلي حطيتي الاستقالة…. و باقي المراحل ما كاتبدلش…